Заев за оставките за пожарот во болницата во Тетово ќе одлучи според резултатите од истрагата

Фото: Принтскрин, Влада на РСМ

Премиерот Зоран Заев се обрати до јавноста попладнево, со соопштение кое се однесува на започнатата експертска истрага и на поднесените оставки за несреќата во ковид-центарот во Тетово.

Премиерот смета дека трагедијата во која 14 луѓе загинаа во пожарот во болницата треба да се расчисти низ независна и експертска истрага и дека резултатите од таа истрага ќе решат за одговорноста на функционерите што си поднесоа оставки.

Според Заев, пожарот ги издигнал на највисоко ниво солидарноста меѓу граѓаните, респонзивноста на институциите и одговорноста на политичарите.

“Поднесените оставки од министерот за здравство Филипче, од заменик-министерот Хасани и од директорите на тетовската болница Бесими и Етеми ги примив и ги разбирам како висок морален и етички чин и како демонстрација на интегритет и одговорност која е неминовна при вакви големи несреќи.

Истражните и правосудните органи спроведуваат исклучително темелна, професионална и брза истрага која мора да ги утврди до детаљ причините за избувнувањето на смртоносниот пожар. Кон стручноста и кредибилноста на истрагата ќе придонесат и форензичарите од Германската федерална криминалистика, за што веќе се реализираат подготвителни извидувања и активности и за што упатувам огромна благодарност до нашиот НАТО сојузник, Германија“, се вели во обраќањето на Заев.

Преиерот вели дека истрагата се врши на највисоко можно стручно ниво, а одлуката за тоа дали ќе ги прифати оставките ќе се базира само на истрагата и сознанијата од неа.

„Имајќи предвид дека истрагата се спроведува со висока динамика и дека истата е обезбедена со највисоко ниво на стручност и професионалност, мојата проценка и одлука по однос на поднесените оставките ќе ја базирам исклучиво на фактите кои ги добивам од истрагата односно исклучиво согласно утврдените причини за избувнувањето на пожарот. Очекувам тоа да се случи брзо во следниот период за што уште еднаш апелирам до сите институции за брза и темелна истрага.

Одговорност има и ќе има, јасно утврдена врз основа на непобитни форензички факти, а не врз основа на политички пресметки“, порача премиерот.

Првите ставови на Владата ќе ги соопшти на прес-конференција, следната седмица, откако ќе бидат изнесени првите посериозни сознанија од истрагата..

„Апелирам до целиот народ, до јавноста и до претставниците на медиумите, сите да останеме фокусирани на истрагата и на фактите, да го одржиме силен националниот дух, иако сме облеани во тага, да бидеме ангажирани, но и трпеливи, да ја поминеме оваа трагедија заедно и да помогнеме за никогаш повторно да не ни се повтори.

Најавувам дека во текот на следната недела, во првиот момент откако експертската истрага ќе покаже нов посериозен напредок, ќе ги соопштам ставовите на Владата базирани на фактите од истрагата, на прес-конференција на која ќе одговарам на сите прашања од медиумите. Во меѓувреме, Владата, министерствата и сите надлежни институции остануваат отворени и достапни за сите ваши прашања“, порача премиерот Зоран Заев.