Лидерот на СДСМ, Зоран Заев, денеска се сретнал со амбасадорот на Кралството Шведска во Македонија, Матс Стафансон.
Како што соопштуваат од партијата, двајцата соговорници се согласиле дека алтернатива за Македонија е враќање на демократскиот пат, преку фер и регуларни избори и функционирање на правната држава.
– СДСМ најостро се спротивставува за обидот на Никола Груевски и на Ѓорге Иванов за аболиција на криминалци додека граѓани за 100 ќебапи лежат во затвор. Аболицијата мора да биде повлечена. СДСМ целосно поддржува мирни и ненасилни граѓански протести, кои ја испраќаат пораката за слободна и демократска Македонија – рече Заев.
Тој ги нагласил заложбите на СДСМ и за чист, доверлив избирачки список, медиумски реформи и за овозможување на институциите да работат без партиски притисоци како клучни услови за регуларни избори.
– Само преку регуларни избори може да биде избрана кредибилна влада, признаена од сите, која ќе обезбеди стабилност и перспектива на Република Македонија – рекол Заев на средбата со шведскиот амбасадор.
