Во интерес на стабилноста на државата и на граѓаните потребно е итно да се формира новата Влада, како излез од политичката криза, во којашто ја туркаат земјата Никола Груевски и раководството на ВМРО-ДПМНЕ, вели претседателот на СДСМ, Зоран Заев, во денешното издание за српскиот весник „Данас“.
– СДСМ отсекогаш била и ќе биде државотворна партија којашто мисли пред сè на интересите на граѓаните и на државата. Затоа толку внимателно ги движиме демократските процеси. Знаеме какви несериозни луѓе имаме од спротивната страна. Правиме сè што е во наша моќ да обезбедиме промена на власта на мирен начин. Сепак, сакам да кажам дека ова што го прават Груевски и ВМРО-ДПМНЕ на теренот, еве вадат и мали дечиња на улица, од по неколку години, ученици, шират говор на омраза и етничка нетрпеливост – веќе е аларм за сите дека кризата мора брзо да се реши и ќе направам сè, да спречам поголеми штети. Низ институциите на системот, согласно Уставот, очекувам брзо да биде избрана новата влада – вели Заев.
Тој порачува дека очекува денеска да се избере нов претседател на Собранието на Република Македонија.
