Претседателот на СДСМ, Зоран Заев, придружуван од претставникот на преговарачкиот тим на СДСМ, Роберт Поповски, денеска се сретна со претставници на Здружението на новинари на Македонија, Институтот за комуникациски студии и Високата школа за новинарство, Независниот синдикат на новинари, Советот за етика и на Македонскиот институт за медиуми.

На средбата, како што соопштија од СДСМ, било разговарано за неопходните реформи во медиумите во Македонија.

– Сегашниот систем на медиумска пропаганда и на манипулации во информирањето мора да биде урнат поради тоа што е корумпиран и недемократски, им штети на професионалното новинарство и на правото на граѓаните да бидат објективно информирани – рече Заев.

Лидерот на СДСМ додал дека прашањето за реформи во медиумите не е само обврска што произлегува од Договорот во Пржино и од извештајот на Прибе, туку децидно ги бара и Европската Унија во извештајот за Македонија, меѓу условите за продолжување на евроинтеграцискиот процес на земјава.

– За иднината на Република Македонија во моментов нема ништо поважно од фер, регуларни и демократски избори. Нема веродостојни избори без медиумски реформи – рече Заев.

На средбата се разговарало за потребните медиумски реформи, при што е посветено внимание на ставовите на претставниците на медиумската заедница во Република Македонија.

– Неопходно во овој процес, во функција и на фер и веродостојни избори, е департизација и професионализација на советите на Агенцијата за медиуми (АВМУ) и на јавниот сервис МРТВ, кои се сега партиски испостави на актуелната власт – рече Заев.