Владата на денешната седница донесе одлука за финансиска помош од 6 милиони денари за Хрватска, по силниот земјотрес во Петриња, информираше премиерот Зоран Заев на неговиот фејсбук-профил.
„Солидарноста е првиот порив во овие моменти и ќе пружиме помош согласно потребите. До премиерот Андреј Пленковиќ и до сите хрватски граѓани погодени од земјотресот упатувам силна поддршка. Во име на сите граѓани на Северна Македонија изразувам и сочувство за жртвите,“ напиша Заев.
Претседателот Стево Пендаровски изрази сочувство до хрватскиот претседател Зоран Милановиќ и до семејствата на настраданите.
„Поддршка за нашите пријатели во Република Хрватска. Првичните информации за земјотресот се застрашувачки,“ напиша Пендаровски на Фејсбук.
Хрватскиот портал Индекс.хр јавува за најмалку тројца загинати и повеќе повредени лица во земјотресот, кој со јачина од 6,2 степени според Рихтер денеска околу пладне ја погоди Петриња, која е под рушевини.