Премиерот Зоран Заев имаше обраќање на пленарната сесија на 74 – тото Генерално собрание на Обединетите нации во Њујорк.

Како што информираат од владата, премиерот Заев во својот говор нагласил дека за прв пат се обраќа од позиција на шеф на Владата на Република Северна Македонија со комплетирана лична карта на земјата во Обединетите нации, во чија карта се наведени името на државата, јазикот и државјанството на нејзините граѓани.

– Сега имаме исклучително добри односи со Грција, и со тоа придонесовме да зајакне регионалната стабилност и да се поттикне развојот на Западен Балкан – истакна премиерот Заев.

Тој се заблагодари на целата поддршка што ја дадоа Обединетите нации преку 20 – годишната работа на Метју Нимиц, кој работел со двете земји за изнаоѓање на решение за спорот за името.

– Веруваме дека Спогодбата од Преспа е вистински пример за моќта на дипломатијата и дијалогот и дека е корисен пример за многу други отворени прашања – потенцираше премиерот Заев.

Осврнувајќи се на една од централните теми на ова собрание – климатските промени, премиерот Заев потенцирал дека е неопходна реализацијата на заклучоците од Парискиот договор за да се препознае и прифати влијанието на климатските промени како закана за безбедноста и стабилноста во светот и разорните последици од овие промени врз човештвото, се наведува во соопштението на владината прес – служба.

– Национално дефинираните придонеси се клучни за да се забрзаат активностите во однос на климатските промени. Северна Македонија ги зголеми националните придонеси според Парискиот договор, а истите се инкорпорирани како цели во нашите национални закони и политики – рече Претседателот на Владата на Северна Македонија Заев.

Како земја активен партнер на меѓународните коалиции против тероризмот, рече премиерот Заев, Владата на Северна Македонија ќе продолжи да придонесува кон мултилатералните напори за борба против тероризмот, како и во справувањето со уште еден современ предизвик – масовните миграции.

Тој истакна дека здружен, мултилатерален настап е неопходен и кога станува збор за лажните информации и дезинформациите, заедно со целно – насочените кампањи кои се закана и го поткопуваат глобалното демократско владеење, истовремено ставајќи ја на испит отпорноста на демократските општества во целиот свет.

Премиерот Заев во завршницата на своето обраќање нагласи дека унапредувањето и заштитата на човековите права, демократијата и владеењето на правото остануваат темелни столбови на вредностите и дејствувањето на Обединетите нации.

– Република Северна Македонија и натаму цврсто го поддржува мултилатерализмот. Ќе продолжиме да работиме со сите засегнати страни во денешниов фрагментиран свет. Ова е наш заеднички свет – потенцираше премиерот Заев на крајот.