Лидерот на СДСМ, Зоран Заев, во интервју за „Топ-тема“ на телевизијата „Телма“ рече дека ќе се појави пред Анкетната комисија за скандалот со прислушувањето откако премиерот Груевски јавно ќе сведочи.
Во врска со скандалот со фалсификуваните лични карти, Заев потсети дека тие се издадени од 2009 до 2014 година и истакна дека истрагата треба да потврди за која намена и за која цел се правени. Тој потврди дека фотографијата со осомничениот за фалсификуваните лични карти е направена во неговата партиска канцеларија, но додаде дека и Груевски е осомничено лице, па и со него седи и разговара.
Лидерот на СДСМ, исто така, истакна дека материјалите што ги поседуваат ќе бидат доставени до Специјалното обвинителство кога ќе бидат исполнети условите за нивното безбедно чување.
