Сите лица што моментално се во притвор да се ослободат, побара лидерот на СДСМ, Зоран Заев, на денешната граѓанска дебата за слободно општество и за социјална правда, што се одржува во „Холидеј ин“ во Скопје.
Тој праша зошто ситни криминалци се во притвор кога осомничени за злосторничко здружување се на слобода. Според него, одлуките на Кривичниот суд кои се однесуваат на осомничените во процесот „Титаник“ докажуваат дека судот селективно ја користи мерката.
Тој уште еднаш испрати порака дека следните избори што ќе се случат во Македонија, мора да бидат фер и демократски.
– Во Македонија мора да има фер и демократски избори, јас за ова дишам. Не знам каде ќе ме викнат утре на средба, но денеска сум тука и слушнав многу корисни работи. Не можат само партиите или само невладините организации да ја извојуваат оваа битка, мораме сите заедно – порача Заев.
