Лидерот на СДСМ, Зоран Заев, вечерва пред жителите на скопската населба Капиштец, меѓу другото, рече дека има сериозни докази дека кумановските настани од 9 и од 10 мај минатата година ги организирала „врхушката на власт“.
„Кумановските настани имаат оставено сериозни докази дека врхушката на власт ги организирала. И, на крајот, ја гледате ли бесрамноста? Еден ден по кумановските настани, каде што изгубивме осум животи на млади полицајци, дале 2 милиони и 600 илјади евра на „Сител“, на „Алфа“, на „Канал 5“ да ја лажат повторно јавноста“, ја пренесува „А1 он“, изјавата на Заев.
На средбата со жителите на Капиштец, Заев вели дека не случајно барале да имаат министер во Министерството за внатрешни работи, туку за да можат да реагираат доколку некој на изборите се обиде да краде гласови и да заплашува.
„Во Изборниот законик е предвидено, тој што купува гласови и уценува да одговара со казна затвор од три до пет години. Затоа и го баравме Министерството за внатрешни работи за да има директна реакција. Тој што ќе го фатат како краде гласови и заплашува, веднаш има наредба Оливер Спасовски да апси и да приведува. Слободно изразена волја е императив, светост и има да ја постигнеме“, вели Заев.
