Премиерите на Македонија и на Грција Зоран Заев и Алексис Ципрас денеска го имале телефонскиот разговор што го најавија пред 10 дена како своевидна завршница на договорот за името.

Како што информираат од Владата, Заев и Ципрас се слушнале во 14 и 15 минути по македонско време и разговарале околу еден час.

„За време на разговорот се дискутираше за преостанатите прашања и беа разгледани неколку идеи за решенија. Во текот на утрешното претпладне ќе следува уште еден телефонски разговор“, се вели во краткото соопштение.

Денешниот телефонски разговор Заев – Ципрас, попладнето го најави грчкиот шеф на дипломатијата Никос Коѕиас, по вонредната средба што ја имаше со грчкиот премиер.