Поради остатоци од снег на коловозoт, забранa за движење на тешки товарни возила има на патниот правец Тетово – Попова Шапка, јавуваат од АМСМ.
На патниот правец Македонски Брод – Прилеп Р-1303, поради оштетување на дел од мостот на Сланска Река, исто така е воведена забрана за сообраќај на тешки товарни возила и на автобуси потешки од седум тона.
На магистралниот пат Кратово, кај месноста Гардиште, во атар на селото Којково, поради свлечиште на земја и на камења, сообраќајот се одвива по една коловозна лента за патнички возила, додека за товарни возила истиот е забранет.
Од АМСМ потсетуваат дека од вчера е прекинат сообраќајот на патот Р 291-75, кој ги поврзува селата Могила и Радобор, бидејќи истиот е поплавен.
Во општина Крива Паланка, регионалните патни правци кон селата Огут и Луке, како и локалните патни правци кон селата во планинскиот дел, заради висината на снежната покривка (50-60 сантиметри) се непроодни. И локалниот пат кон село Дренак е непроден од селото Дурачка Река, во должина од околу седум километри.
Во општина Ранковце, регионалниот патен правец кон селото Герман, поради новите врнежи од снег е непрооден.
Според информациите добиени во АМСМ од ЈП „Македонија пат“, сообраќајот на останатите државни патишта се одвива по влажни коловози. Снег со многу слаб интензитет провејува на планинските превои Буково, Ѓавато и Крушево, кој не се задржува на коловозот.
АМСМ препорачува внимателно возење, прилагодена брзина на движење и почитување на поставената сообраќајна сигнализација. Особено внимание е потребно на делниците кои минуваат низ клисурите и низ засеците, особено на патните правци Катланово – Велес, Маврово – Дебар – Струга, Демир Капија – Удово, Кочани – Делчево и Виница – Берово, каде е можна почеста појава на одрони.
