Владата на вчерашната седница донесе одлука да усвои забрана за движење и групирање во сите паркови, излетнички места, места за рекреација во националните паркови и шуми, како и во викенд населбите, во периодот од четврток 16 април во 16 часот до 5 часот во вторник 21 април, информираат од владината прес-служба.
Забраната е донесена на предлог на Главниот координативен кризен штаб и истата повлекува затворање на овие локации, а Министерството за внатрешни работи е задолжено да ги интензивира контролите на овие места.
Полицијата за претстојните велигденски празници е задолжена да ги интензивира контролите околу верските храмови за време на претстојниот празник. Периодот на забрана и посебен режим на движење ќе важи и за верниците од православна вероисповед, кои планирале да одат во црква.
Од владата потсетуваат дека полицискиот час ќе важи од 17 април (петок) од 16 часот до 21 април (вторник) во 5 часот.
На владината седница се донела и одлука за продолжување на времетраењето на мерката карантин за најмалку 21 ден за сите оние македонски државјани кои ќе влезат на граничните премини по 13 април, а биле затекнати во земји со висок ризик од Ковид-19.
На седницата е донесена и Одлука за изменување и дополнување на Одлуката за спроведување на задолжителен државен карантин на државјаните на земјава вратени од странство со хуманитарни летови, според која оваа Одлука важи и за државјани кои се вратени од странство и со конвои по копнен пат.