Уште една пациентка која вчера вечер на Инфективната клиника во Скопје како сомнителен случај била тестирана за корона вирус е со негативен резултат, односно го нема корона вирусот, соопшти Министерството за здравство.
Претходно вчера беше тестиран еден патник кој пристигнал од Дубаи пред шест дена, а завчера вечерта беше тестиран сомнителен случај на патник кој допатувал од Милано. И патничката што е испитувана вчера допатувала од Милано, пишуваат медиумите.
„Ја следиме ситуацијата, постапуваме согласно протоколите на СЗО и продолжуваме редовно да ја информираме јавноста“, соопшти Министерството за здравство.
Владата на вчерашната седница, врз основа на препораките на Кризниот штаб за справување со корона вирусот на Министерството за здравство и на Управувачкиот комитет за координација и управување во системот за управување со кризи, го задолжи Министерството за здравство, да формира постојан центар за информирање на јавноста во кој ќе бидат вклучени и Граничната полиција, Центарот за управување со кризи и Секторот за односи со јавноста во Владата.
Владата донесе заклучок и да го ограничи влегувањето во земјата од кризните подрачја од Северна Италија само преку аеродромите во Скопје и Охрид и граничните премини Ќафасан, Табановце, Блаце, Богородица и Деве Баир.
„Владата му наложи на Министерството за здравство итно да набави соодветна количина на заштитни средства (маски, ракавици, дезинфекциски средства и заштитна облека) за институциите од системот за Интегрирано гранично управување и за другите институции со цел заштита на персоналот,“ се вели во владиното соопштение.
Исто така, Министерството за здравство треба итно да набави соодветна количина сапун и дезинфекциски средства за училиштата, детските градинки и јавните тоалети.
Владата донесе одлука да ги задолжи сите основни и средни училишта, како и сите универзитети да ги одложат сите предвидени патувања и екскурзии во Италија, како и да организира едукативни часови за превенција од корона вирусот, во соработка со локалната самоуправа и центрите за јавно здравје.
Меѓу заклучоците на Владата за превенција и за справување со опасностите, на граѓаните на земјата им се препорачува да не патуваат во Италија и во другите земји каде што е регистрирано поголемо присуство на корона вирусот.
Меѓу заклучоците од 11-тата седница на Владата е и препораката до установите за згрижување на деца од предучилишна возраст да преземат мерки за соодветен третман за дезинфекција на обувките при влегување во градинките.