Бројот на регистрирани моторни возила кои користат нафта односно дизел горива во периодот од 2012 до 2017 година пораснал од 118.109 на 233.381 возило, што е речиси двојно зголемување за период од шест години, покажуваат податоците на Државниот завод за статистика. Ако на овие податоци се надоврзе и фактот дека просечната старост на возниот парк во земјава изнесува над 18 години, тогаш станува јасно дека ќе бидат потребни илјадници црвени налепници за обележување на овие возила доколку се реализира Планот за чист воздух што неодамна го најави Владата.
Имено, Владата најави воведување еколошки налепници, кои ќе се издаваат во зависност од европските емисиони стандарди при што возилата ќе бидат поделени во три категории.
Автомобилите со вграден уред на течен нафтен гас или компримиран земјен гас, хибридни возила и електрични возила ќе бидат означени со еколошка налепница во зелена боја. Тие ќе може слободно да се движат во заштитените еколошки зони. За автомобилите од 1996 до 2005 година на кои им е вграден уред за погон на течен нафтен гас или погон на компримиран земјен гас, ќе се залепи еколошка налепница во жолта боја. За нив ќе има ограничено движење во сообраќајот.
За автомобилите пред 1996 година како и за возилата за кои производителот нема дефинирано емисија на издувните гасови, ќе има налепница во црвена боја и за овие возила ќе се воведе забрана за движење во општините во период кога има загадување на воздухот.
Екологистите подолг период бараат да се запре увозот на стари употребувани возила, практика што беше воведена од минатата владејачка гарнитура, а што придонесе драстично да се смени возниот парк во земјава, но и да се зголеми загадувањето од издувните гасови.
