Лидерот на европските либерал-демократи во Европскиот парламент и поранешен белгиски премиер, Ги Верхофстад, изрази загриженост утрово за сè поголемите тензии во Македонија. Тој смета дека „продлабочувањето на политичката криза и масовните демонстрации се алармантни“.
Верхофстад им изрази поддршка на тројцата европратеници кои посредуваат помеѓу власта и опозицијата во Европскиот парламент.
– Сега времето е најбитно. Политичките лидери во земјата треба да почнат конструктивен дијалог, да ја вратат правната држава и довербата во институциите – вели Верхофстад и додава дека е потребна независна истрага по скандалот со прислушувањето.
Неговиот сопартиец и посредник во преговорите во Брисел, Иво Вајгл, оцени дека политичката криза е опасна за стабилноста на земјата и на регионот. Тој повика политичарите да ги стават интересите на државата пред интересите на партијата.
Т.М.