За да се смири состојбата, во северно Косово треба да се одржат нови локални избори

Имаме три јасни барања – одржување на нови локални избори во северно Косово сега, осигурување на учеството на Србите на овие избори и започнување на работите за воспоставување на Заедницата на српски општини во рамките на дијалогот потпомогнат од ЕУ. Ова е пораката што преку Твитер ја испрати високиот претставник за надворешна и безбедносна политика на ЕУ Жозеп Борел по средбата која што ја имаше со српскиот претседател Александар Вучиќ и косовската претседателка Вјоса Османи.

We have 3 clear requests:

– new local elections now
– ensuring the participation of Kosovo Serbs
– start the work to establish the Association of Serbian Majority Municipalities w/in EU-facilitated Dialogue

Failure to do so, will have serious consequences for our relations. pic.twitter.com/xT4n0oPymK

— Josep Borrell Fontelles (@JosepBorrellF) June 1, 2023

Борел предупреди дека непостапувањето по овие барања ќе има сериозни последици по односите меѓу ЕУ од една страна и Косово и Србија од друга страна.

Во Приштина денеска се одржува вонредна седница на косовското собрание за ситуацијата на северот, на која се обрати премиерот Албин Курти. Тој за време на собраниската расправа рече дека Белград мобилизирал криминални групи за ескалација на ситуацијата во северно Косово, пренесува Данас.

Сепак, Курти преку Твитер порача дека нови локални избори во северниот дел од Косово би можеле да се одржат, но претходно ќе треба да се повлече насилната толпа од пред општинските згради.

„Повлекување на насилната толпа пред општинските згради (…) е пат кон деескалација сѐ до одржување нови избори“, напиша Курти на Твитер.

Always good to talk w/ @ChrisMurphyCT, @SenatorRicketts & @SenatorShaheen. Thanked them for their long-standing support of 🇽🇰.
Removing violent mobs in front of municipality buildings & full implementation of the B. Agreement is the way toward de-escalation until new elections.

— Albin Kurti (@albinkurti) June 1, 2023

Инаку, денеска е шести ден од протестите на припадници на српската заедница од Косово пред општинските згради во Звечан, Лепосавиќ и Зубин Поток, кои се противат новите претседатели на општините да влезат во овие згради.

Србите ги бојкотираа последните локални избори што се одржаа во северно Косово, поради што во северниот дел на Митровица и во три други општини победија кандидати на албанските партии. На бојкот повика партијата Српска листа блиска до властите во Белград, која чекорот го образложи со несоздадените услови за основање Заедница на српски општини.