Вучиќ за РТС: Знаеме сè, разузнавачките активности се правени на многу повисоко ниво

Српскиот претседател, Александар Вучиќ, во интервју за српската државна телевизија РТС вели дека Србија нема да дозволи да биде понижувана, но дека нема потреба од паника кај народот во Србија и во Македонија „бидејќи никој не сака судири, ниту ќе има“.

Во однос на одговорот на македонскиот министер за надворешни работи, Никола Димитров дека Владата на Македонија не прислушувала, ниту планирала нешто такво, Вучиќ рече дека е свесен дека тоа се прави на едно многу повисоко ниво.

– Димитров беше многу прецизен велејќи „Владата не наредила, ниту планирала“. Ние знаеме. Нашата контраразузнавачка служба е силна. Знаеме што сè правеле. Правено е тоа на едно многу повисоко ниво, но тоа не им се прави на пријателите. Тоа го правеа и некои други во регионот, па интерно ги предупредивме тоа да не го прават. Проблемот тука што се прави една политичка приказна за да се вовлече Србија, во која нема да дозволам да бидеме вовлечена – рече Вучиќ, додавајќи дека тешко дека односите меѓу двете држави ќе бидат на највисоко ниво, поради ставовите на Македонија за Косово, но дека ќе тие ќе бидат „на пристојно ниво“.

Вучиќ вели дека е подобро темите да се отвораат, за да има повеќе фокус и внимание на тоа, отколку да се премолчуваат работите. Во контекст на тоа го спомна „крвавиот четврток“, и присуството на припадникот на БИА, Горан Живаљевиќ на во Собранието за време на насилствата.

– Тргна голема хајка против Живаљевиќ, дека тој е одговорен за тоа што се случувало во Собранието, бидејќи работел заедно со руските служби. Затоа што им беше тешко да кажат дека Русија и посветила толку многу внимание на Македонија, па мора да вовлечат и некој друг. Тешко им беше да ги вмешаат Бугарите, Грците и Албанците, па ги вмешаа оние кои немаат никакви територијални претензии кон Македонија и никогаш ништо не направиле против Македонија – вели Вучиќ.

Тој рече дека време е да престанат да молчат по тоа прашање и да им откријат на граѓаните кој му дозволил на Живаљевиќ да биде во Собранието.

– Па тој Живаљевиќ не отишол на своја рака. Не ме прашал мене, ниту кого било во нашата земја, иако нам треба да би полага сметки. Тој го прашал највисокиот претставник на извршната власт на Македонија, директно го прашал: „Јас сакам да бидам таму. Дали имате нешто против?“. Тие беа целосно запознаени со неговото присуство – вели Вучиќ, додавајќи дека тоа е искористено за да се води кампања против Србија и за Србија да се врзе со приказните на големите сили, со кои немаме никаква врска.