Премиерот на Србија, Александар Вучиќ, денеска не сакаше да одговори на новинарско прашање дали заедно со претседателските избори напролет следната година, ќе бидат одржани и вонредни парламентарни избори. Тој истакна дека за тоа ќе одлучуваат повеќе луѓе и дека каква и да биде одлуката, предизборната кампања ќе биде кратка.
– Каква и да биде кампањата, било само да е претседателска или парламентарна или и двете, за тоа ќе се одлучува кога ќе дојде време. Каква и да биде, изборната кампања ќе биде кратка – рече Вучиќ.
На заедничка конференција за новинари со еврокомесарот за проширување Јоханес Хан, Вучиќ рече дека не се занимава со избори затоа што има попаметна работа.
– Што се однесува до изборите, со тоа не се занимавам сега, далеку се изборите. Имам попаметна работа. Работиме вредно и внимателно и можеме да се пофалиме со резултати – додаде Вучиќ.