Руски напад погоди втор голем мост во Киев, изјави градоначалникот Виталиј Кличко додека засилуваат нападите врз критичната инфраструктура во украинскиот главен град, објави Би-Би-Си.
Кличко рече дека нападот утрово ја оштетил површината на патот и надземните жици на Северниот мост.
Нападот се случува откако Јужниот мост во градот беше повеќекратно цел на руски беспилотни летала од четвртокот, а Кличко претходно предупреди дека ваквите напади „го распарчуваат Киев“.
Двата моста ги поврзуваат источните и западните делови на главниот град и не беа погодени до четврток, што сигнализира нова фаза во нападите на Москва.
Претходните напади врз Јужниот мост го натераа Советот за одбрана на Киев да одржи кризен состанок во петокот.
По состанокот, Кличко рече дека градот сега е во „многу драматична ситуација“.
Рускиот претседател Владимир Путин изјави дека Русија дејствува како одговор на нападите на Украина врз руските енергетски објекти, и покрај фактот дека Москва прва ги започна таквите напади.
