На овој сончев саботен ден во првата општествена градина „Бостание“ се „крена“ зимско арт-бостание. Освен тоа што оваа градина е збиралиште на љубители од сите генерации на органската храна и ретките автохтони градинарски култури, се почесто станува збиралиште и на скопските уметници.
Така и овој викенд, додека урбаните земјоделци меѓу кои има и дедовци со внучиња, но и бројни млади градинарки и градинари, си ги обработуваа своите леи, уметниците од алтернативниот културен центар КЦ 750, го дотркалаа зеленото фиќо. Владимир Лукаш, Тома Димовски, Сали Ертунч, Вук Митевски, Иван Ивановски и Иван Шопов на центарот на градината организираа арт-ѓурултии и кренаа креативна џева.
„Изложбава е едно имагинарно патување низ времето и просторот. Практично ова возило кое си го нарекуваме Културен центар 750 е како една временска машина. Се радуваме затоа што имавме можност да го паркираме баш овде, не заради тоа што е забрането за моторни возила, туку затоа што е интересна спојка помеѓу две неконвенционални и нетипични иницијативи, КЦ 750 и општествена градина Бостание. Освен за земјоделски култури градинава веќе неколку пати била отворена и за друг вид култура и мислиме дека од судирот на две нетипични иницијативи може да се изроди, ако не спектакуларен барем интересен резултат“, изјави Шопов за Мета.мк.
Уметниците не го наполнија фиќото со градинарски култури, ама во нивната „временска машина“ седеа скулптури налик на луѓе од рециклирани материјали.
Несомнено е дека ова арт-бостание ја буди желбата за урбано градинарење кај многумина. Некои пак, како Тома Димовски честопати доаѓаат барем за момент да седнат меѓу леите кои кога е сезоната се полни со зелки, разни ароматични билки, домати, грав, сончоглед, магдонос, целер и други градинарски култури и да си ја наполнат душата со убавина.
Шопов вели дека концептот на заедничко градинарство постои во големите метрополи и се надева дека градината на здружението на граѓани „Зелена Арка“, која се наоѓа во близина на подследна 5-ка, нема да остане единствена во нашиот главен град.