Во Собранието на Република Македонија денеска ќе биде врачена државната награда „11 Октомври“ во областа на културата и уметноста.
Годинешни добитници на наградата се академик Митко Маџунков, писател, а во областа на науката и образованието ќе им биде доделена на проф. д-р Никола Јанкуловски, дигестивен хирург, проф. д-р Махмуд Хиса, професор по албански јазик, и на проф. д-р Марјан Димитријевски, историчар и научен работник.
Наградата „11 Октомври“ е највисоко признание за животно дело во областа на науката, уметноста, стопанството и другите дејности од јавен интерес на Република Македонија.
Македонија денеска ја одбележува 74-годишнината од почетокот на Антифашистичкото востание и народноослободителната војна, која почна кога Првиот прилепски партизански одред го нападна бугарскиот полициски участок и телефонско-телеграфската мрежа во Прилеп. Следниот ден се кренаа и партизаните од Кумановскиот одред.
Делегација на Собранието на Република Македонија и на Владата ќе положи цвеќе на партизанските гробишта во Бутел, гробот на претседателот Борис Трајковски, гробот на генерал Михајло Апостолски и гробот на претседателот Киро Глигоров, како и на споменикот на Методија Андонов Ченто и Споменикот на паднатите херои за Македонија во паркот Жена-борец.
Во Прилеп по повод празникот се одржуваат низа манифестации. Празнувањето почнаа во петокот, а централната манифестација ќе се одржи денеска со импровизиран напад на градот и огномет.