Владата да донесе одлука фабриката да работи, а менаџерскиот тим на компанијата да продолжи со изградба на филтер-станицата, побараа вработените од „Југохром“ преку денешната блокада на автопатот Тетово – Скопје кај Желино, која траеше околу два часа. Од синдикатот на „Југохром“ најавија дека утре ќе остварат средба со премиерот Емил Димитриев. Велат дека од одлуката на владата ќе зависи нивната судбина.

– Од премиерот Емил Димитриев ќе побараме владата да донесе одлука „Југохром“ да работи. Компанијата веќе нема финансии за плати и за придонеси, од вчера не ни исплатува ниту пензиско ниту здравствено осигурување. Затоа мора компанијата да работи, да има профит, па да ни плаќа плати и придонеси, а ако работи, фабриката ќе има и пари да ја продолжи изградбата на филтер-станицата – рече Светислав Спасовски од синдикатот на „Југохром“.

Комбинатот „Југохром“ не работи од ноември мината година, откако инспекторатот за животна средина донесе одлука компанијата да ги згасне печките затоа што не го испочитувала крајниот рок за изградба на филтер-станицата. Со затворањето на „Југохром“, 700 лица останаа на улица, но без работа се и надворешните соработници на фабриката, посочија од синдикатот.

– Ние сме 700 лица, но секој вработен во металургијата треба да го помоножиме со пет, значи од „Југохром“ егзиситраат неколку илјади лица – рече Бајрам Амити, престедател на синдикатот на „Југохром“.

Вработените од „Југохром“ поради нивниот нерешен статус, денеска третпат го блокираа автопатот Тетово – Скопје.