Утре, во 19:00 часот во галеријата „КО-РА“ во Домот на култура „Кочо Рацин“, Скопје ќе се отвори изложбата „Медиум пукнатина: Алтернативен сет на потпори за искачување“ од визуелната уметница Ивана Мирчевска.
Се работи за хибридна инсталација составена од видео записи, 3Д креирани средини, физички објекти и звучни пејсажи во авторство на Ивана.
Инспирирана од географските и интимните координати во кои се наоѓа, поставката го препознава Водно и неговата околина како жив организам составен од страни слики, мисли и звуци. Истовремено, уметницата преку своите дела собрани во единственото дело што го изложува ги поставува прашањата: Што ќе се случи кога ќе го напуштиме лепливиот проблем на нашата човечката исклучителност и стегите на нашиот индивидуализам? Како можеме да пројдеме преку сопствената устоличеност во дуализмот на природата и културата и да создадеме простор за повеќевидни битија и битисувања? Каков тип на хибриден пејзаж може да не опкружи нас луѓето и не-луѓето во нова симбиоза и заедништво?
„Преку инсталацијата, го замислуваме Водно како простор чијшто облик и време се мешавина од различни битија, површини и процеси испреплетени во релации и значења прекршени како ризоми. Во пресрет на постојаното нагризување на планината и интернализирање на нејзината материја во корист на економска ефикасност и урбано проширување – трагаме по ново и имагинативно разбирање на телесениот, тактилилниот и значајниот однос преку кој контурите на пејзажот, неговите жители и нашите тела се во постојано взаемно трансформирање и постанувње. Во овој простор, моето друштво и јас, копаме странични тунели во постоечките пукнатини. Наоѓаме временски капсули, фрагменти од распаднати пејзажи, изведувачки простори на хибридни ритуали и разни агрегатни состојби на мемориии. Со емпатија ги лепиме нишките на материјалните и семиотските релации во кои се остваруваме.“, пишува во најавата за изложбата.
„Медиум пукнатина: Алтернативен сет на потпори за искачување“ е дел од проектот „Медиум Пукнатина“, истражувачки и уметнички проект на Мирчевска што е подржан од Министерството за култура на Република Северна Македонија.