Повеќе од десет детски кардиохирушки интервенции се извршени во изминатите два месеца во Клиниката „Жан Митрев“ откако почна да функционира новиот модел на јавно-приватно партнерство.
Детскиот кардиохирург Владимир Чадиковски кој со тим на лекари и медицински сестри замина од државната Детска хирургија во клиниката „Жан Митрев“ рече дека станува збор за пет деца на возраст над една година, а другите се на возраст под една година. Тој посочи дека, бидејќи станува збор за бебиња од два килограма со тешки срцеви мани, американски тим опсервира од страна, а тие ги вршат интервенциите.
– Имаме 12 комплетно опремени кревети за интензивна нега, операциска сала која постојано ни е на располагање, каде можат да се извршат и најтешките интервенции во комбинации со интервентна кардиологија, магнет и компјутерска томографија. Целта ни е да ги згрижиме најтешко болните деца во државата, не само оние со срцеви проблеми, туку секое дете кое ќе бара екстремно добро опремена интензивна нега со кадар. Имаме тим кој е сертифициран за дијализа на бебиња – рече Чадиковски.
Министерот за здравство, Венко Филипче рече дека овие модели на партнерство помеѓу приватното и државното здравство се иднината што треба да се развива во нашиот здравствен систем.
– Сакаме да ги отвориме вратите за влез на приватниот капитал и на тој начин да ги надградиме условите, тие да се подобрат. Тенденцијата не е да се затвораат болниците, туку да се надградат и осовременат и да дадат здравствени услуги кои граѓаните ги заслужуваат. Ќе правиме се да ги зголемиме инвестициите во здравството, квалитетот на здравствената услуга и пристапот не само по моделот на јавно-приватно партнерство, туку и преку законските измени кои ги правиме со цел вкупниот број доктори од различни сфери да биде достапен за сите граѓани – истакна Филипче.
Директорот на Фондот за здравствено осигурување, Ден Дончев, рече дека кардиохируршките операции кои ќе се извршуваат во приватната болница, ќе продолжат да бидат на товар на Фондот како и досега.
Според доктор Жан Митрев, сопственик на Клиниката, од кога почнале, имаат направено над 1.000 интервенции врз деца со вродени срцеви маани.
– Речиси 20 години згрижуваме 80 до 90 деца. Ние континуирано ја работиме таа детска кардиохирургија. Меѓутоа неонаталната детска кардиохирургија е нешто плус посебно во однос на она што значи квалитет, посветеност и исчекор во таа област – додаде д-р Митрев.
