Полица со масло за јадење во супермаркет во Тирана, Албанија. Фото: Meta.mk.

Супермаркетите и маалските продавници низ Тирана нудат најразлични видови масло за јадење, односно зејтин, од домашно и странско потекло.

Тимот на Мета.мк посети неколку супермаркети и продавници во главниот град на Албанија и дојде до сознание дека најевтиниот вид сончогледово масло е „Кинг“ кое е увезено од Украина, при што литар чини 279 леки или околу 143 денари.

Украинско сончогледово масло „Кинг“ во супермаркет во Тирана, Албанија. Фото: Meta.mk.

Во албанските продавници може да се најдат десетици различни видови масла од домашно и странско потекло, oд албанскиот „Олим“ до унгарскиот „Флориол“. Дел од цените за литар од различни типови сончогледово масло се:

  • King – 279 леки или 143 денари
  • Solei – 299 леки или 154 денари
  • Gold – 300 леки или 154 денари
  • Olim – 309 леки или 159 денари
  • Diamond vitamin E – 309 леки 159 или
  • Floriol vitamin E – од 319 до 321 леки, зависно од продавницата, односно од 164 до 165 денари

Освен сончогледовото масло, во тиранските супермаркети има и алтернативи како масло од пченка oд италијанско потекло. Неговата цена се движи помеѓу 299 и 390 леки, односно од 154 денари за „Дајмонд“ до 200 денари за „Конад“.

Сончогледово и пченкарно масло во супермаркет во Тирана, Албанија. Фото: Meta.mk.

Цените на пченкарното масло се движат помеѓу:

  • Diamond – 299 леки или 154 денари
  • Olitalia – од 325 до 399 леки, зависно од типот и продавницата, односно меѓу 167 и 200 денари
  • Big market – 329 леки или 169 денари
  • OrMais – 339 леки или 174 денари
  • Zucchi – 360 леки или 185 денари
  • Conad – 390 леки или 200 денари

Во продавниците низ центарот на Тирана е достапно и маслиново масло од домашно албанско, како и грчко и италијанско потекло, со широк опсег на цени и пакувања.

Колку за споредба, сончогледовото масло во дел од македонските маркети може да се најде по цена од под 100 до 134 денари. За волја на вистината, во некои маркети е тешко да се дојде до овој производ бидејќи, едноставно, го нема на полиците.