Во попладневните часови наврнаа 21 литар на еден квадратен метар во Тетово, 20 литри во Маврово и во Пожаране, 16 литри во Скопје, 13 литри во Охрид, 12 во Лазарополе, 9 во Преспа и 4 литри на квадратен метар во Битола и во Тополчани, покажуваат мерењата на Управата за хидрометеоролошки работи до 15 часот.
Во Маврово и во Лазарополе формирана е и снежна покривка од три сантиметри.
– Врнежите од дожд почнаа од запад во попладневните часови. Во Скопскиот Регион има појава и од грмежи проследени со засилен ветер, најмногу во Штипскиот Регион, каде достигнува и до 80 километри на час. Силен ветер има и во Пелагониската и во Скопската Котлина. Врнежите во вечерните часови ќе се пренесуваат од централниот дел кон истокот, а во првиот дел од ноќта ќе се повлечат и ветерот ќе стивнуваа. Во Лазарополе забележавме и врнежи од снег – вели Борис Секирарски, дежурен синоптичар при УХМР.
Од УХМР велат дека утре ќе има преодно стабилизирање. Ќе преовладува облачно време со сончеви периоди и намалување на ветерот. Нови врнежи се очекуваат од среда, а пообилни в четврток и в петок. Овој влажен бран ќе донесе и намалување на температурата.