Со задолжителните заштитни маски и дезинфекција на влезот од гласачките места се одвива гласањето во 80 избирачки места во Штип. Изутринава во седум часот беа отворени сите гласачки места, каде гласањето се одвива без никакви проблеми.
До 9.00 часот излезноста e 9,77 или гласале вкупно 3.424 гласачи, соопштуваат од Општинската изборна комисија. На гласачките места од изутрината можат да се забележат главно повозрасни луѓе, кои изјавија дека гласањето се одвива релативно брзо и се задржуваат само по неколку минути.
Во Општината Штип право на глас имаат 39.566 граѓани. Поради новите мерки за заштита од корона вирусот, променети се 14 избирачки места каде ги немаше неопходните услови за одвивање на гласањето. Овие гласачки места се дислоцирани во училишта и во деловни простории на привнатни компании.
Вчера гласаа 196 болни и изнемоштени лица, како и затворениците од КПД Затвор Штип. Таму, од 192 гласачи од избирачкиот список, гласале 168 затвореници.
Во понеделникот гласаа 43 од пријавените 45 болни од ковид-19 и лица во изолација.
Во Штип до 21 часот ќе биде отворена канцеларијата на Народниот правобранител, каде граѓаните можат лично и на телефонот 032 389-701 да пријават попречување на правото на гласање.
