Руски борбени авиони во изминатите 24 часа извеле 33 воздушни напади врз 49 цели на Исламска држава во Сирија, соопшти денеска портпаролот на руското министерство за одбрана, Игор Конашенков, јавуваат светските агенции.
Конашенков соопштил дека бомбардери од типот „сухој Су-25“ во два од нападите го уништиле главниот центар за обука на милитантите на Исламска држава (ИД), кај градот Латакија, користејќи бомби со голема експлозивна моќ.
Во нападите, додал портпаролот, биле уништени и два командни центри на ИД, три склада за оружје и за муниција, 32 лансирни позиции, два подземни бункери и еден објект за производство на проектили.
Според министерството за обрана на Русија, во нападите биле гаѓани цели во провинциите Алепо, Идлиб, Латакија и Хама.
