Во организација на здружението за субкултура ПП ЏЕЗ ФЕСТИВАЛ, од четврток до недела во Центарот за култура „Марко Цепенков“ во Прилеп ќе биде одржано јубилејното 10-то издание на фестивалот „Prilep Jazz Weekend“.
Фестивалот оваа година ќе го отворат Кантон 6, пионерски кросовер музички проект, кој датира од 2000 година и е интелектуален производ на Синиша Евтимов, еден од водечките современи македонски театарски режисери и Мирко Попов, композитор/продуцент, диџеј, издавач и музичар воопшто. Постојаната промена и желбата за авантура, го доведоа Кантон 6 до големото џез откровение, па последниве неколку години за бендот се исполнети со бројни соработки и лајв импровизации. Таа активност резултираше со третиот по ред, неверојатно интересен албум „Џезус“, во кој на основните членови на групата им се приклучи и извонредниот џез и класичен тромбонист, лидер на легендарните Сетстат, Владан Дробицки. „Џезус“ носи сосема оригинален звук, но и длабоко мистичен призвук. Основната електроника е третирана во македонски етно манир со модерен допир, а вкрстувањето со џезот е храбро, но природно….
Првата вечер од фестивалот ќе ја затворат „Летечки пекинезери“, бенд кој повеќепати настапувал во Прилеп, со голем број локални обожаватели кои годинава направија голем притисок кај организаторот за нивното учество на овогодинашното јубилејно издание на Prilep Jazz Weekend. „Летечки пекинезери“ е состав кој постои повеќе од 15 години на македонската џез сцена. Од првобитната формација трпи многу мали измени, но филозофијата на овој бенд, сепак, останува иста во текот на годините. Самото име им е одбрано со намера да се разниша општото мислење на луѓето дека џезот е премногу интелектуална музика која не секој ја разбира. Затоа главната цел на овој состав е да се придобие секој слушател, без разлика дали се работи за претерано музички едуцирана личност или, пак, лаик во таа област.
Нивниот звук најмногу гравитира кон свинг-звуците од 30-тите и 40-тите години на минатиот век, но ако внимателно слушате или, да речеме дека сте познавач на свинг-музиката, ќе наидете на многу моменти кои и не се толку својствени за составите од тоа време. Тоа се должи најмногу на фактот дека „Летечки пекинезери“ изведуваат исклучиво авторска музика и како состав од Македонија не се плашат понекогаш да се препуштат на влијанието на македонската музика. „Летечки пекинезери“ се : Бојан Петков (гитара),Иво Солдатовиќ (кларинет), Петар Христов (тенорски саксофон), Кирил Туфекчиевски (контрабас), Славчо Коцев (тапани).
Втората вечер ќе ја отворат Taxi Consilium….како што умеат за себе да кажат: „ Taxi Consilium е спиритуално присоединување на четири озлогласени арамии од болникавиот македонски џез етер и сите можни други офтикави форми на музичка експресија (членови на: Cobalt Code Unit, Yordan Kostov Quintet, Filip Bukrshliev Trio, Fighting Windmills, Svetlost Odron Ritual Orchestra, Shock Troopers…), поведени од вечната мудрост на искусните таксисти: моторизираните урбани бессоници и поети на асфалтниот егзодус, éminences grises кои што како предвесници на исходи слепи и неминовни се сноват по пустите градски улици во 3 часот по полноќ. Како виежот на осамениот кларинет кој што им свири контрапункт на звуците на обљуба кои што доаѓаат од другата соба. Како што Eric Dolphy би звучел кога би бил лик во роман од Thomas Pynchon. Сенки и испарувања, злокобна смеа во далечина. Малициозно стврднување под долгиот мантил во сомнително мрачно сокаче
Вториот дел од вечерта е резервиран за гитаристот Тони Китановски и бендот „Панда 5“. Панда 5 е музичка лабораторија составена од врвни македонски џез артисти која изведува оригинални композиции од Китановски. Белег на овој состав е спонтаната и често колективна импровизација во солистички аранжерски манир. Нивниот прв албум насловен “Big City Scare” го издаде СЏФ во 2018. Во проширена формација насловена Toni Kitanovski Little Big Band повторно настапија на СЏФ минатата година. Во Прилеп ќе изведуваат композиции од двете инкарнации на составот како и нешто ново. Заедно со нив ќе настапи и гостинот од САД, трубачот Chad McCullough, истакнат интернационален изведувач кој живее во Чикаго, Илиноис. Неговиот последен албум, Forward беше прогласен за еден од најдобрите албуми за 2020 година во Chicago Tribune. Работи на факултет во одделите за џез на DePaul University и UW-Madison .
Третиот ден на фестивалот ни нуди многу интересна програма. На почетокот ќе имаме можност да ги слушнеме „Tribute to Jazz messengers“… еден комбо состав од врвни Македонски џез инструменталисти кој дава омаж на легендарниот бенд „Jazz messengers“.
„Јazz messengers” почнуваат со работа во раните 1950-сти и се активни се до 1990 год. Низ составоот ќе продефилираат повеќе еминентни џез артисти како: Art Blakey( како лидер или ко – лидер на бендот), Kenny Dorham, Hank Mobley, Benny Golson, Lee Morgan, Wayne Shorter, Horace Silver, Freddie Hubbard, Curtis Fuler, Wynton Marsalis, Brentford Marsalis имногу други. Групата секогаш била терен за млади артисти, а со самото челенување во “Messengers” истите добивале легитимитет во џез светот. Во нивната дискографија со огромно значење тие имаат неверојатни: 47 студиски албуми, 21 албуми во живо, 6 компилациски албуми и 2 албуми со наменска музика.
Џез викендот ќе го затвори составот на врвни музичари SAYUGÀ QUARTET feat. JURE PUKL…ѕвезда на вечерта е саксафонистот Јуре Пукл, артист кој живее и работи во Њујорк а го завршил Berklee Colege of Music, исто како и познатиот пијано музичар Васил Хаџиманов, чие име веќе многу далеку одекнува во светот на џез, ворлд и импровизираната музика. Васил зад себе има остварено многу значајни дела, одлични концертни настапи и со својот препознатлив виртуозен стил на музицирање значи многу повеќе од само едно обично отсвирување на музиката. Заедно со Оливер Јосифовски, кој пак е музичар слуган војска шо се вели, и Александар Петров, тапанар, перкусионист кој што долго време живееше во Париз, твореше во Њујорк го составуваат квартетот SAYUGÀ.
Ова година Prilep Jazz Weekend фестивалот може да се пофали и со квалитетна OFF програма: На 29 август на локалитетот Врбјанска Чука (кај село Славеј) ќе може да се проследиме перформансот „Ljubojna Ambience“. Тоа е проект посветен на музиката како амбиентален простор што не опкружува и нејзиниот одзвук како постојана звучна состојба. Прави да с запрашаме што се е музика и каде се музиката може да патува.
Бендот Љубојна веќе 20 години гради широк и слоевит звучен дизајн, менувајќи ги, раздвижувајќи и комбинирајќи ги звучните модели во различни созвучја.
