За неколку дена во Охрид ќе биде отворен првиот од двата центри за рехабилитација, едукација и сензорна интеграција, наменети за ран третман на лица со аутизам, АДХД и аспергеров синдром.
Првиот од центрите, којшто ќе биде наменет за повозрасни лица, ќе се наоѓа во Специјалната болница за ортопедија и трауматологија „Св. Еразмо“ и ќе биде отворен на 8 ноември. Вториот центар е предвидено да биде наменет за деца на возраст од 2 до 8 години и ќе се наоѓа во охридската Општа болница.
Носител на овој проект е Здружението на граѓани за третман на лица со аутизам, АДХД и аспергеров синдром „Во мојот свет“, а се реализира со поддршка на Министерството на здравство, кое ги отстапува просториите за користење во рамки на Општата болница во Охрид и Болницата Св. Еразмо.
Реконструкцијата и опремувањето на двата центри за аутизам во Охрид е финансирано од страна на Амбасадите на Република Бугарија и на Република Чешка во Скопје.
