Граѓанската иницијатива „Во одбрана на Дебар Маало“ го поздравува напорот на градоначалникот на Општина Центар, Андреј Жерновски да го решава проблемот со блокираните тротоари на Дебар Маало со изградба на монтажни паркинзи и поставување на заштитни столпчиња на улиците, но, смета дека ова решение е како ставање „ханзапласт на отворена фрактура на потколеница“.
„Инсистираме дека мора да се изработат научни студии и стратегија за развој на Дебар Маало за кои ќе бидеме консултирани. (Општината) мора да одговори на нашите анкетни забелешки и мора да престане со издавање на дозволи за градба додека не се утврди фактичката состојба“, стои во реакцијата на иницијативата.
Од граѓанската иницијатива прашуваат и „дали новата гаража е место за нови или за ист број возила, само тргнати од тротоарите“.
Жителите на Дебар Маало во понеделникот, оваа недела излегоа на протест, на кој ги повикаа Општината Центар, Градот Скопје, МВР и полицијата да преземат мерки за да ги заштитат пешаците, а особено децата од опасностите кои демнат од тротоарите окупирани со возила, од неорганизираниот сообраќај и од неконтролираното градење.
Тие порачаа дека тротоарите се за пешаци, а не паркинг-прстор за заработка.
