Во рамките на својата програма за борба против дезинформациите и лажните вести, што на Балканот многу лесно ги минуваат границите и бргу осамнуваат во медиумите на друга држава и понекогаш и на друг јазик, „Мета.мк“ редовно пренесува што е актуелно кај сродните сервиси за проверка на фактите и борба против дезинформациите во регионот, но и во светот.

Грчкиот портал за проверка на фактите и борба против дезинформациите ellinikahoaxes.gr одговара на неточни тврдења објавени во некои медиуми пошироко во светот, кои се пренесени од грчки веб-сајтови – дека наводно патент за дијагностички тест за ковид-19 е побаран уште во 2015 година. Но, како што утврдил ellinikahoaxes.gr, во 2015 година се појавува оригиналната идеја за патент, но за метода за обработка на биометрички податоци, која воопшто не е поврзан со болеста ковид-19. Годинава таа метода за прибирање податоци е користена со цел за зајакнување на процесот на дијагностицирање вирусни заболувања, вклучително и ковид-19.

Поподробно, во спорните текстови на грчките медиуми се тврдело дека на веб-сајтот Espacenet.com може да се впише изум или патент, како и дека под кодот US 2020279585 на овој сајт пишува дека извесен Rotschild Richard GB на 13 октомври 2015 г. го впишал текстот за ковид-19 како свој патент. Статиите со вакво тврдење биле придружени и од видео во кое извесен др. Шифман го тврди тоа. Но тврдењето е целосно погрешно претставено од страна на др. Шифман, а соодветно на тоа, и статиите изнесуваат неточности, пишува ellinikahoaxes.gr.

Грчкиот сервис за проверка на фактите и борба против дезинформациите појаснува дека Espacenet.com е во суштина сајт за пребарување патенти, но не е единствената база на податоци каде што може да се најдат патенти. Сличен сервис е patents.google.com, кого ellinikahoaxes.gr го користела за да го побара наведениот патент US2020279585. Според наведеното на patents.google.com, на 13 октомври 2015 година е изнесена оригиналната верзија на патентот, кој се однесува на прибирање и обработка на биометриски податоци за некој човек, како што се пулс, крвен притисок, итн. преку видео, во комбинација со податоци добиени од соодветни уреди и апарати за биометриски податоци.

Оваа комбинирана метода би имала различни примени, како на пример за многу систематско и ефикасно следење на физиолошката состојба на некој човек при спортска активност, како и за следење на физичката состојба на некој пациент заради поставување дијагноза. Се разбира, оваа генерална идеја за дијагностицирање не е поврзана со дијагностицирање на ковид-19, бидејќи во 2015 година не постоела таа болест.

Идејата е обновена на 17 мај годинава, преку сличен метод за прибирање биометриски податоци преку апликации за смартфон, со цел да се потпомогне дијагностицирањето на некоја инфекција или болест, вклучително и на болеста ковид-19. Патентот е конечно објавен на 3 септември годинава, но досега не е одобрена неговата примена, ниту пак со оваа метода може да се дијагностицира само ковид-19.

Исто така, во патентот од 2015 година видливо е дека воопшто не се споменува болеста ковид-19, пишува ellinikahoaxes.gr