Граѓанската платформа „Ајде“ денеска во 17.30 часот ќе организира протест против одлуката на Уставниот суд да ја прифати иницијативата за измени Законот за помилување со кои се овозможува да се помилуваат лица осудувани и гонети за изборни криминали.
„Уставниот суд денеска застана во одбрана на криминалците од власта кои местеле избори. Во рекордно брзо време ја разгледа и ја прифати иницијативата за преиспитување на уставноста на измените на Законот за помилување, поточно за забраната Претседателот на државата да помилува лица осудени за изборни нерегуларности. Со ова, ВМРО-ДПМНЕ уште еднаш покажа дека за нив правниот систем е само алатка која им служи за заштита од правдата, а не за нејзино спроведување. Ние граѓаните нема да дозволиме крадците на нашите животи, преку партиски узурпираниот Уставен суд да си ги спасат своите злосторничко-криминални „кожи“ од издржување на заслужените затворски казни. Нема да дозволиме повторно да си поигруваат со државните институции како да се нивен личен имот или партиски огранок. Во Македонија мора да се врати правдата, почитувањето на законите и пред сѐ, почитувањето на Уставот. Затоа, денеска во 17.30 часот, „Ајде“ ве повикува да протестираме пред Уставниот суд на Република Македонија“, пишува во повикот на платформата.
Организаторите додаваат дека на судиите кои се грижат единствено за спасување на своите наредбодавци, ќе им порачаат, јасно, гласно и решително, дека тие се одговорни пред сите граѓани на оваа држава и дека не можат и не смеат да го газат Уставот секогаш кога тоа ѝ одговара на владејачката партијата или секогаш кога ќе треба да се спасуваат криминалците во власта.
