Заев избира меѓу интересите на мнозинството Македонци и намерите на Зијадин Села, кој од позиција на влада сите Македонци во Струга сака да ги избрка од работа и да ги прогласи за технолошки вишок, стои во денешното соопштение на ВМРО-ДПМНЕ.
„Регионалните министерства тука во Струга нема да имаат вработени 20 отсто Албанци или 10 отсто или ниту еден, туку 65 отсто ќе бидат Албанци, Македонците ќе излезат како технолошки вишок, затоа што ги имаат зафатено нашите места. Ова е изјава од изборен митинг на Зијадин Села, човекот од кого ќе зависи идното парламентарно мнозинство на СДСМ во парламентот. Ова е агендата што ќе ја реализира Села доколку дојде на власт“, велат од ВМРО-ДПМНЕ.
Од партијата велат дека лидерот на Алијанса на Албанците отворено го негира македонскиот идентитет и не ги признава македонското знаме и химна и истите планира да ги смени, а лидерот на СДСМ, Зоран Заев, молчи и не ја отфрла „тиранската платформа“.
„Човекот што без срам ја отвори вратата за дебатирање и оспорување на македонскиот идентитет, како и федерализација на Република Македонија е аболираниот Зоран Заев. Дебатата почна да се реализира на дело. Питер Ванхауте под маската на дипломат отворено зборуваше за редефинирање на Република Македонија. Албанската пратеничка Месила Дода јавно пред сите се закани дека доколку Заев отстапи од платформата, тогаш сите Албанци ќе се ангажираат околу остварување на сонот за Илирида. Зоран Заев и СДСМ ниту еднаш не ги осудија овие изјави, молчеа и сè уште молчат“, стои во соопштението на ВМРО-ДПМНЕ.
Оттаму додаваат дека остануваат на својата „принципиелна понуда“, односно доколку СДСМ се откаже од „тиранската платформа“, ВМРО-ДПМНЕ да му даде поддршка на Заев за состав на влада, а во спротивно СДСМ да прифати нови парламентарни избори, заедно со локалните.
