На обвинувањата од опозицијата дека власта е одговорна за загаденоста на воздухот, од ВМРО-ДПМНЕ го прашуваат СДСМ, што тие презеле за подобрување на квалитетот на воздухот кога имале можност за тоа.
„Недостигот од воздух кај СДСМ е директно поврзан со ефектите на нивните фашистички предлози за Законот за медиуми“, возврати ВМРО-ДПМНЕ на реакцијата на СДСМ за загадувањето на воздухот.
„СДСМ не може да дише поради воздухот кој го загади нивната тоталитарна реторика. Затоа СДСМ сака да се зборува за сè, само не за нивната срамна политика која резултира со мизерен рејтинг на нивниот лидер и 2 спрема 1 сооднос во корист на ВМРО-ДПМНЕ. СДСМ, покрај ова, треба да одговори и што воопшто преземале за подобрување на квалитетот на воздухот кога имале можност за тоа. СДСМ треба да каже зошто со прст не мрднале нивните министри и градоначалници. Зошто не смогнале сили барем да постават мерни станици за да се знае квалитетот на воздух во градовите?“, реагираат од ВМРО-ДПМНЕ, додавајќи дека нивната влада го спровела законот сите индустриски капацитети да ги осовременат своите технологии до 1 април 2014 година.
