Советниците од опозициската ВМРО – ДПМНЕ најавија дека ќе ја напуштат седницата на Советот на Општина Штип, на секоја точка од дневен ред, каде се бара промена на името на институциите со додавката Северна. На последната седница беа измените на Статутот на ОУК Дом на млади, каде требаше да се додаде додавката Северна секаде во документот каде стои Република Македонија. Оваа точка беше одложена за наредната седница, откако опозициските советници од ВМРО – ДПМНЕ ја напуштија седницата.
– Ја напуштаме седницата бидејќи остануваме на истиот став дека нема да учествуваме во гласањето во таа точка, како и на претходната седница, кога имаше во една друга институција користење на зборот Северна во нејзиниот назив – изјави Иван Јорданов, координатор на советничка група на ВМРО – ДПМНЕ.
На овој однос на опозицијата, претседателот на Советот, Јане Миланов најави дека во иднина принципиелно ќе се придржуваат на Деловникот за работа на ова тело, кое предвидува намалување на советничкиот надоместок за 30 отсто, доколку советниците отсуствуваат од седницата или работата на комисиите.
– Јас само потсетив на деловникот. Вообичаено имаме по една седница во месецот и ако советникот не се појави на седницата или неоправдано отсуствува од работата на комисиите каде членува, следува намалување на надоместокот – изјави Миланов.
Советниците за работата во Советот и помошните тела, земаат по 60 отсто од просечната плата за минатата година, односно по над 16.000 денари месечен паушал.
