Делегација на ВМРО-ДПМНЕ ќе присуствува на состанокот на лидерите на четирите најголеми партии од Македонија за излез од кризата, што в петок во Виена го планира меѓународната заедница.
Од партијата потврдуваат дека ја добиле поканата што тројцата европратеници, Иво Вајгл, Едуард Кукан и Ричард Ховит, ја упатиле до лидерите на ВМРО-ДПМНЕ, Никола Груевски, на СДСМ, Зоран Заев, на ДУИ, Али Ахмети, и на ДПА, Мендух Тачи.
Од партијата не посочуваат кои функционери ќе бидат членови на делегацијата.
Во СДСМ, за „Мета“ велат дека почнуваат широки консултации во рамките на коалицијата, но и со невладините организации кои се дел од движењето „Протестирам“.
Конечната одлука дали воопшто ќе се учествува на разговорите во Виена и со каква агенда, ќе била донесена деновиве по консултации со политичките партнери и со невладините организации.
На средбата во Виена е предвидено да присуствуваат и комесарот на ЕУ за преговори за проширување, Јоханес Хан, и амбасадорите на ЕУ и на САД во Македонија, Аиво Орав и Џес Бејли.
