Горан Сугарески јавно изнесува невистини дека новиот автопат Миладиновци – Штип ќе чини дополнителни 20 милиони евра, пари што наводно требало да ги платат граѓаните на Република Македонија, одговори ВМРО-ДПМНЕ на денешната прес-конференција на министерот за транспорт и врски, Горан Сугарески.
Од опозициската партија велат дека дополнителните работи на автопатот нема да чинат ништо.
„Не туку мафтајте со некакви документи и не манипулирајте ги граѓаните тврдејќи дека се потребни дополнителни пари за изградбата на овој автопат. За да биде појасно, се работи за информација доставена до Владата на Република Македонија во април 2017 година, во која стои прогресот на извршените градежни работи на автопатот Миладиновци – Штип. Во истата информација стои дека се бара согласност од Владата за продолжување на рокот на изградба на автопатот поради причини кои од градежна природа бараат дополнително време на изведување. Имено, во информацијата за предлогот за пролонгирање на изградбата на овој автопат, стои дека изведувачот се согласува да не поднесува какви било финансиски побарувања заради загуби од режиски трошоци или изгубен надомест на основа на овие исклучени работи“, се вели во реакцијата.
