Набргу по почнувањето, претставниците на ВМРО-ДПМНЕ денеска ги напуштиле преговорите за регулација на работата на медиумите.
Од извори блиски до преговарачките групи дознаваме дека партијата на власт ги напуштила преговорите затоа што некои од работите кои ги кажал белгискиот олеснувач тие ги сфатиле лично иако тие, всушност, се однесувале на предлозите. Како што брифираат некои од учесниците во преговорите, ВМРО-ДПМНЕ не биле најконструктивната партија и неколку недели „само си играле“.
Од СДСМ велат дека ова е позната стратегија на ВМРО-ДПМНЕ за одбегнување на обврските од Договорот од Пржино.
„ВМРО-ДПМНЕ продолжува со стратегијата на одолговлекување и на непочитување на обврските преземени со договорот од 2 јуни од 15 јули. Регулирањето на медиумите е еден од клучните критериуми, без кои не се возможни фер, демократски и регуларни избори. Со ваквото однесување, ВМРО-ДПМНЕ го доведува во прашање Договорот од Пржино“, се вели во соопштението на СДСМ.
Белгискиот олеснувач Питер Ванхауте очекува претставниците на партиите во најкус можен рок да се вратат на преговарачката маса.
Од владејачката партија денеска не беа достапни за изјава да објаснат зошто ги напуштиле преговорите.
