Грчкиот премиер Алексис Ципрас тактизира за полесно да се изгласа втората листа приоритетни мерки договорени со кредиторите. Пред грчкиот парламент, кој утре треба да се изјасни за мерките, нема да се најдат две болни мерки како реформирањето на пензинскиот систем преку зголемување на границата за пензионирање, укинување на прераното пензионирање и извесните придонеси за пензионерите, а нема да се најдат ни мерките за укинување на придонесите и олеснувањата за земјоделците.
Овие две мерки се очекува да се гласаат подоцна во текот на летото, за Ципрас да добие време да се зајакне парламентарното мнозинство на СИРИЗА и да не се изгубат дополнителни пратеници како по гласањето за главниот пакет и првата листа приоритети од минатата недела, со која грчкиот премиер доби шлаканица од 30-тина пратеници од неговата матична партија.
На гласање ќе биде Кодот за цивилни процедури, со кој ќе се работи на забрзување на правните и бирократските процедури за граѓаните, а ќе се гласа и за предлозите за осигурување на депозитите и за процедурите за реорганизација на кредитните институции.
Со тоа што прво ќе се гласа за овие помалку болни мерки, Ципрас се надева дека ќе успее да го задржи посигурно парламентарното мнозинство на СИРИЗА, односно нема да дозволи тоа да се сведе на помалку од 120 пратеници, што ќе го доведе под знак прашалник опстанокот на актуелната влада и ќе ја доведе Грција пред итна потреба за избори. Премиерот се надева дека на овој начин ќе премисли барем неколку од шестмината пратеници на СИРИЗА што гласаа воздржано минатиот пат, да го дадат својот глас за мерките и поддршка на владата при ова гласање.
Паралелно, ќе се олесни минимално и обидот на владата да се продолжи со напорот за спроведување на новиот пакет мерки и мирно, непречено продолжување на процесот на преговори со европските кредитори.
Бројот на гласови ќе одлучи и за идните чекори на Ципрас за средување на внатрешните работи во поделената СИРИЗА, каде врие како во котел меѓу оние кои бараат левицата да не ги прифати овие мерки, кои се против нејзините принципи, и оние кои велат дека нема друг начин да се спаси државата освен да се прифатат и во текот на преговорите мерките да се ублажат и да се прилагодат.
Сценариото за предвремени избори и понатаму се слуша, но наидува на негативни коментари од сите страни, со оцена дека ќе ја доведе државата во нови неизвесни финансиски и политички перипетии.
М.П.
