Владата донесе неколку одлуки насочени за заштита на ранливи категории граѓани истиот ден кога Регулаторната комисија објави дека струјата на 1 јануари ќе поскапи за 9,48% и притоа ќе се укине дневната евтина тарифа.
Како што информира владината прес-служба, со оваа програма се дефинираат потрошувачите кои спаѓаат во оваа категорија, мерките за заштита кои се преземаат, начините за реализација на мерките, мерките што ги преземаат операторите на системите за дистрибуција на енергија, мерките што ги преземаат снабдувачите со обврска за обезбедување на јавна услуга, односно универзална услуга во снабдувањето со енергија, и потребните средства и извори за финансирање.
Според одлуката, Министерството за економија ќе обезбеди финансиска поддршка за домаќинствата со ниски приходи кои ќе добиваат пониски сметки за електрична енергија во текот на 2022 година.
„Со ова, Министерството за економија првпат воведува парична помош за најранливите категории граѓани. Согласно програмата за која се предвидени околу еден милион евра, самците и домаќинствата со два члена кои имаат месечни приходи до 18.000 денари и домаќинствата со три члена со месечни приходи до 21.000 денари ќе добиваат помали месечни сметки за електрична енергија за 600 денари. Домаќинствата со четири члена со месечни приходи до 25.000 денари и домаќинствата со пет и повеќе члена кои имаат месечни приходи до 30.000 денари ќе добиваат помали сметки за струја за 800 денари“, изјави министерот за економија Крешник Бектеши.
Со оваа мерка ќе бидат опфатени над 7.500 домаќинства во Македонија, кои ќе можат да аплицираат на јавниот оглас што следниот месец ќе го објави Министерството за економија.
Од владата информираа дека ранлив потрошувач е домаќинство коешто користи гарантирана минимална помош и остварува паричен додаток заради покривање на дел од трошоците за потрошувачка на енергенси во домаќинството во согласност со Законот за социјална заштита и во коешто живее лице во состојба на социјален ризик (мајчинство, болест, старост, повреда и попреченост).
За заштита на ранливите потрошувачи предвидени се следните мерки:
- Директна финансиска поддршка на ранливи потрошувачи на енергија како паричен додаток заради покривање на дел од трошоците за потрошувачка на енергенси во домаќинството во месеците од октомври до март.
- Финансиска поддршка за лица со ниски примања доколку нивните редовни месечни примања не го надминуваат нето приходот и тоа: за самец до 15.194,00 денари; за домаќинство со два члена до 18.000,00 денари; за домаќинство до три члена до 21.000,00 денари; за домаќинство со четиричлена до 25.000,00 денари; и за домаќинство со петчлена и повеќе члена до 30.000,00 денари. Овие лица ќе го остварат правото по пат на јавен оглас кој ќе го објави Министерството за економија.
Финансиската поддршка ќе се исплатува 12 месеци со право на намалување на месечната сметка за потрошена електрична енергија во износ од 600,00 денари месечно, сметано од денот на поднесување на барањето.
За Ранливите потрошувачи коишто користат гарантирана минимална помош и остваруваат паричен додаток заради покривање на дел од трошоците за потрошувачка на енергенси во домаќинството се предвидени и дополнителни мерки што ги презема операторот на системот за дистрибуција на енергија, како што се ослободување од обврските за плаќање на надоместок за повторно приклучување, трошоците за вонредна верификација на мерната опрема, како и други слични мерки.
За спроведување на оваа Програма обезбедени се средства во износ од 60.000.000,00 денари и ќе се применува од 1 јануари 2022 година.
Дополнително, Владата ги задолжи сите институции во надлежност на извршната власт од сопствените буџетски сметки и програми предвидени за набавка на електрична енергија, веднаш да ги исплатат долговите кон добавувачите на струја и одобри да се изврши пренамена на средства од други буџетски ставки каде што има неискористени средства за исплата на долговите за кон добавувачите на електрична енергија.
Овие одлуки, како и препораките до институциите на локалната самоуправа, до Собранието и до Канцеларијата на Претседателот на државата, имаат за цел да го помогнат снабдувањето со електрична енергија кое се остварува преку комерцијалните добавувачи.
Владатаја разгледа и усвои Информацијата за усвојување на тендерска документација за втора фаза во постапка за доделување на концесија за користење на вода за производство на електрична енергија од хидроелектрични централи на Црна Река.
Согласно резултатите од првата фаза, 9 од 10-те пријавени компании ги исполнија условите од претквалификацијата и со тоа се стекнаа со право да достават на понуди за втората фаза.
