Владата порача дека пристапува со внимание и сериозност кон комплексните состојби со кои се соочува светското природно и културно наследство во Охридскиот регион години наназад. Сепак, како што стои во соопштението, за незавидната положба, е виновна претходната власт.
„Долгогодишното лошо управување со регионот и мегаломанските проекти кои беа закана за езерото и националниот парк беа причина УНЕСКО да испрати мониторинг мисија во април 2017 година. Од почетокот на својот мандат, Владата активно се посвети на решавање на проблемите во регионот, во соработка со општините и граѓанскиот сектор“, стои во владиното соопштение.
Во иднина, ќе треба да се работи со поголем интензитет за зачувување на светското наследство во земјава, но потенцира дека е направен напредок во спроведување на препораките од УНЕСКО.
„Оваа предлог одлука, која не е финална, треба да биде стимул за сите институции и за граѓаните да се работи со поголем интензитет за да го зачуваме нашето уникатно светско наследство. Владата смета дека е остварено поместување во исполнување на препораките, и дека крајната одлука треба тоа јасно да го рефлектира. Преостанува уште работа и во наредниот период фокусот ќе биде ставен на исполнување на останатите препораки на УНЕСКО и тоа мора да биде остварено бидејќи природното и културно наследство на Охридскиот регион не припаѓа само нашата земја, туку на целиот свет“, уверува Владата.
Во најновиот нацрт-извештај на УНЕСКО се дава препорака за впишување на Охрид на листата на загрозено светско наследство. Изготвениот извештај треба да биде разгледан на 43. сесија на Комитетот за светско културно наследство што ќе се одржи кон крајот на јуни во Баку, Азербејџан.
