Видеото е направно во март 2020 година и на него е прикажано како папката која ја држи Сунак, кој тогаш бил министер за финансии, ја менува бојата од црвена во зелена. Промената на бојата на папката е визуелен ефект направен за да се долови поентата за зелен буџет во рамките на еден телевизиски прилог, пишува „Вистиномер“ во својата анализа.
Текстот подолу го пренесуваме во целост:
Пост на Фејсбук споделува видео на кое се гледа новиот премиер на Британија, Риши Сунак како држи папка во рацете која се чини дека се менува од црвена во зелена боја. Постот лажно го толкува видеото како некаков заговор.
Еве јас глупава сум, поучете ме. Како папката од црвена стана зелена? Си играл некој со видеово? Ајде, експерти, кажете. Колку дена ќе трае новиот поставен премиер? Да отвориме кладба…, се наведува во објавата која ја анализираме.
Во некои од коментарите се сугерира дека видеото открива „пропуст во матрицата“.
Матриксот малце се збуна.
Со ова се упатува на теоријата на заговор инспирирана од франшизата на научно-фантастичните филмови „Матрикс“.
Оваа заговорничка теорија сугерира дека светот е симулација создадена од елитна сила за да го пороби човештвото. Застапниците на ваквата теорија велат дека луѓето можат да кажат дека сè околу нив е симулирано ако внимаваат на грешки или дефекти во програмирањето на вонземјаните – како на пример, нешто што одеднаш ја менува бојата.
Видео клипот за Сунак всушност е преземен од извештајот на Скај њуз од 9 март 2020 година за буџетските планови на Британија.
На него е прикажано како Сунак, кој тогаш бил министер за финансии, држи во раката папка која ја менува бојата од црвена во зелена. Но, ова беше визуелен ефект направен за уредување, а не знак за некаква грешка во матрицата.
Јас го продуцирав делото. Тоа вклучуваше само мал прекинувач за боја за да се нагласи потребата за зелен буџет. Тоа е во контекст на климатски/буџетски поглед напред, објави тогаш на Твитер поранешната новинарка на Скај Њуз, Ријанон Вилијамс.
Еден од нејзините поранешни колеги, исто така, рече:
Тоа беше уред што го користеа нашиот дописник за климатски промени и нејзиниот уредник на видео, кој го поставуваше прашањето „колку зелен ќе биде буџетот…?“ Мора да се признае дека е прилично суптилен!!
Извештајот на Скај Њуз беше објавен два дена пред Сунак да ја достави изјавата за буџетот до британскиот парламент. Вклучуваше неколку еколошки ветувања, вклучително и воведување данок за пакување на пластика, инвестирање 1 милијарда фунти во „зелени транспортни решенија“ и поставување најмалку две капацитета за зафаќање и складирање јаглерод.
Од ова можеме да заклучиме дека промената на бојата на папката е визуелен ефект направен за да се долови уредувачка поента за зелен буџет за потребите на еден телевизиски прилог од март 2020 година, кога Сунак бил министер за финансии Според тоа, сметаме дека на постот што го анализираме му недостига контекст.
