fbpx

Вистиномер: Варијанти на ковид кои веќе постојат, претставени како „идни и планирани“

-

Постот што се споделува на Фејсбук е мaнипулативен и невистинит. Варијантите на ковид: ета, јота, капа и ламбда, се веќе детектирани и се предмет на интерес на СЗО. Но, наспроти тоа што го говорат фактите, оваа објава манипулира дека тие допрва ќе бидат сукцесивно објавувани во медиумите, наводно, како план за замајување на јавноста и одржување на вештачки притисок, пишува Вистиномер.мк.

Рецензираме пост на Фејсбук, во кој лажно се тврди дека ковид варијантите, односно мутациите на коронавирусот, „се планирани“ и згора на тоа, сукцесивно ќе бидат објавувани во следните месеци. Во постот што е предмет на нашиот интерес, наведена е листа во која се напишани букви од грчката азбука, кои што симболизираат вид на ковид мутација, а до нив има датум, кога наводно тие мутации ќе бидат објавени во јавност.

Ве молам, ПОГЛЕДНЕТЕ ЈА ТАБЕЛАТА ЗА ВИРУСИТЕ КОГА СЕ ПЛАНИРАНИ според Џон Хопкинс Универзитетот и под покровителство на Светски економски Форум. Датите – се кога ке бидат вирусите објавени по медиумите. КОВИД19 вакцнина не ја спречува болеста – но инсталира оперативен систем во вашето тело кое ке е манипулирано со делта (5Г) микробранов систем, пишува во постот.

Исто така, се вели дека обновувањето на вакцините ќе стане задолжително „од септември 2021 и ќе се обновуваат додека не станеш бескорисен јадач!“, се вели во постот.

Детектирани мутации на ковид: ета, јота, капа и ламбда

Ќе почнеме од почетокот. Светската здравствена организација (СЗО) реши да ги именува варијантите на коронавирусот, односно неговите мутации, според буквите од грчката азбука. Причината за ваквата одлука е за да може немедицинската јавност полесно да ги следи мутациите и информациите за нив.

Во моментот, според официјалните сознанија од СЗО, предмет на нејзин интерес се неколку мутации: ета, јота, капа и ламбда. Сите четири мутации, под имињата ета, јота, капа и ламбда, се наведени во списокот објавен на постот, меѓутоа манипулацијата е настаната во моментот кога се тврди дека тие се планирани да бидат објавени во иднина! А, всушност, станува збор за четири мутации (ета, јота, капа и ламбда), кои не само што се веќе детектирани, туку се и предмет на интерес на СЗО.

Ета е откриена на 17 март 2021 година, јота во САД во март 2021 година, капа во Индија во април 2021, а ламбда во Перу во јуни 2021 година. Дека овие ковид мутации веќе постојат и се предмет на интерес на СЗО, објави самата СЗО на својата веб-страница.

Но, во постот што го рецензираме, се крева паника дека, наводно, станува збор за идно планирање за пуштање во оптек на овие варијанти, што нема допирна точка со реалноста.

За ета се тврди дека ќе биде објавена во медиумите во септември 2021 година, но за оваа варијанта, наголемо се пишува во медиумите и веќе е откриена.

За јота мутацијата се тврди дека во ноември 2021 година ќе биде објавена во медиумите, меѓутоа таа е веќе и детектирана и објаснувана.

За капа варијантата, исто така е објавено дека е пронајдена, иако во постот лажно се тврди дека таа ќе им биде објавена на луѓето преку медиумите дури во декември годинава.

А за ламбда варијантата, светските медиуми веќе нашироко објаснуваат, иако постот ја најавува дури за 2022 година.

Од овие четири примери за четири мутации на ковид може да се извлече заклучок дека временските рамки дадени во постот се лажни, односно не се базирани на факти, што е докажливо на лесен начин, затоа што мутациите се веќе постоечки и веќе набљудувани од СЗО. Трендот којшто се сака да се наметне во постот, е да се разубеди јавноста дека постои временска рамка на сукцесивно откривање на варијантите на ковид, како дел од некаков си план светот да биде во постојана тензија и напнатост за да се набавуваат нови и нови вакцини. Меѓутоа, варијантите се реалност и вакцинацијата е глобална стратегија за заштита од нив, .

Само 0,02 отсто од вакцинираните се заразиле со ковид-19

Во постот се тврди дека вакцината не ја спречува болеста. Но, она што досегашните искуства со вакцината го покажуваат е дека таа спречува тешка форма на болеста и спречува хоспитализации.

На пример, Министерството за здравство на РСМ информираше дека од вкупно 330.320 граѓани со примени две дози вакцини во земјава, 96 биле позитивни на ковид по примена втора доза вакцина. Тоа значи дека само 0,02 проценти од нив се заразиле со ковид што укажува колку е важно граѓаните да се вакцинираат. Од 96-те позитивни, 56 се заразиле во период помал од 21 ден од примената втора доза вакцина. Само 13 од заразените со ковид биле хоспитализирани.

Третиот најнелогичен дел од постот е оној во којшто се тврди дека „ковид вакцината инсталира оперативен систем во вашето тело кое ќе е манипулирано со делта (5Г) микробранов систем“?!

Не е јасно на што се мисли и што е тоа микробранов систем. Јасно е дека со ковид вакцинацијата граѓаните нема на ниеден начин да бидат следени, ниту каков било чип ќе биде инсталиран во нив и на оваа тема детално образложивме во оваа рецензија.

Поради сите изложени факти, постот што го рецензираме го оценуваме како невистинит. Варијантите на ковид не се ниту планирани, ниту ќе бидат сукцесивно објавувани во медиумите како план за замајување на јавноста и одржување на вештачки притисок, туку тие се постоечки и веќе се следат, пишува Вистиномер.мк.

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.
ФИНКИ

ФИНКИ бара Владата да ги ослободи бараките на Техничкиот кампус, во спротивно најавува протести и штрајк

Најбројниот факултет во земјава – Факултетот за информатички науки и компјутерско инженерство (ФИНКИ) бара од Владата решение за просторниот проблем со кој се соочува институцијата. Со повеќе од 5.000...