Говорот на шефот на фармацевтскиот оддел на Бајер, Стефан Орлих не содржи тврдење дека вакцината против ковид-19 е генска терапија, како што се тврди во објавата што ја рецензираме. Според Орлих, фактот што светската популација ја прифати мРНК вакцината, може да отвори нови патишта за технологии во медицината како генска терапија, технологии кои Бајер ги промовира против болести како анемија или Паркинсова болест. Орлих направил споредба меѓу мРНК вакцините и генските терапии како пример за технолошки напредоци во полето на медицината, пишува „Вистиномер“ во својата анализа.
Текстот подолу го пренесуваме во целост:
Рецензираме пост објавен на социјалната мрежа Фејсбук, во кој се вели дека шефот на фармацевтскиот оддел на Бајер, Стефан Орлих, на Светскиот здравствен самит признал дека вакцината против ковид-19 е генска терапија. Според наведеното во постот, тој изјавил дека фармацевтските компании знаеле дека луѓето ќе ја одбијат вакцината доколку се открие дека всушност станува збор за лек што го менува генот. Авторот на постот заклучува дека граѓаните биле лажени за профит бидејќи вакцината, според наведеното во постот, не спречила никој да не се зарази или да го пренесе вирусот.
Повеќе странски сервиси за проверка на фактите, веќе имаат утврдено дека тврдењето дека Стефан Орлих кажал дека вакцините против ковид-19 се генска терапија, е невистинито.
Имено, во својот говор на Светскиот здравствен самит во 2021 година, тој рекол дека мРНК вакцините се пример за технолошка иновација, исто како и генската терапија предложена од Бајер. Неговото тврдење е извадено од контекст и изманипулирано за лажно да се тврди дека вакцините против ковид-19 ја модифицираат човековата ДНК. Тоа е чест мит кој циркулира уште од почетокот на вакциналната кампања против ковид-19.
Целиот говор на Орлих може да се проследи на следниот линк (1 час, 29 минута).
Неговиот говор е фокусиран на новите технологии во медицината и јавната доверба во овие технологии. Според Орлих, фактот што светската популација ја прифати мРНК вакцината, може да отвори нови патишта за технологии во медицината како генска терапија, технологии кои Бајер ги промовира против болести како анемија или Паркинсова болест. Орлих направил споредба меѓу мРНК вакцините и генските терапии како пример за технолошки напредоци во полето на медицината.
мРНК вакцините нема да влезат во јадрото на клетката кое го складира ДНК геномот. Нема никаков ризик дека овие вакцини се интегрираат во геномот или ја менуваат генетската форма, рекол тој.
Институтот Харвард пак, пишува дека генетската терапија вклучува процес во кој проблематични генски секвенци се заменуваат со здрави и на таков начин превенираат развој на болест. Генската терапија не се користи во развојот на вакцините против ковид-19, бидејќи овие вакцини не ги заменуваат и не ги менуваат човечките гени.
Според Министерството за здравство на Романија, вакцините со мРНК не вклучуваат состојки кои би можеле да ја модифицираат ДНК на личноста. Улогата на мРНК молекулата во вакцината е да им даде на клетките инструкции да продуцираат спајк протеин, на кој имунолошкиот систем ќе реагира со производство на специфични антитела. мРНК не се интегрира со вирусната ДНК во клеточното јадро на реципиентот и се разложува брзо откако ќе ја постигне целта да произведе спајк протеин.
Повеќе светски сервиси за проверка на факти потенцираат дека мРНК вакцините не се генска терапија, а за истото веќе пишуваше и Вистиномер.
Дополнително, во постот што го рецензираме невистинито се тврди дека вакцините против ковид-19 не спречиле никој да се зарази или да го пренесе вирусот. Точно е дека вакцинираните може да се заразат и да бидат преносители на вирусот, исто како и невакцинираните. Меѓутоа, вакцината дава заштита во поглед на создавање полесна клиничка слика, со цел да се спречи хоспитализација и смрт кај пациентот.
Поради сите горенаведени факти, оценуваме дека не е вистина дека вакцините против ковид-19 се генетска терапија и дека тие не спречиле зараза и пренос на вирусот.
