Фото: Мета.мк

Целото тврдење дека вакцината го убила Данецот Џорџ Олесен е манипулација. Да, тој бил вакциниран, но во постот е испуштено да се каже дека се соочувал со други здравствени проблеми повеќе години наназад. Исто така, Олесен не е сегашен, туку поранешен најсилен човек на светот. Кога починал имал 60 години, а дански шампион во супертешка категорија во кревање тегови станал во 1983 година, пишува „Вистиномер“.

Анализата подолу ја пренесуваме во целост:

 

 

Објава на Фејсбук објава тврди дека наводно најсилниот човек на светот, Џорџ Олесен од Данска, починал поради примена вакцина. Вака споделена, информацијата, на која ѝ недостасува соодветен контекст, е дезинформација.

НАЈСИЛНИОТ ЧОВЕК НА СВЕТОТ УБИЕН СО БОЦКА
Најсилниот човек на светот, г-дин Џорџ Олсен, почина неколку месеци откако примаше експериментални вакцини за генска терапија mRNA.
Данскиот државјанин г-дин Џорџ Олсен направи 199 Гинисов рекорди – 37 од нив се уште се рекорди.
Г-дин Олсен почина од згрутчување на крвта во срцето.

Ваквата дезинформација ударно се соопштува во објавата, која е напишана и на македонски и на англиски јазик и притоа кон постот е линкуван медиумски напис на дански јазик.

Но, во текстот од медиумот, којшто е ставен како доказ, никаде не пишува дека Џорџ Олесен починал како резултат на вакцината. Впрочем, во медиумскиот напис нема ништо објавено што би можело да се поврзе со вакцина. Нема никаков доказ дека вакцината е причина за неговата смрт. Не пишува ниту дали бил вакциниран или не бил, а уште помалку со кој вид вакцина бил вакциниран.

На самиот Фејсбук пост се прикачени две фотографии од Инстаграм профилот на Олесен. На првата фотографија, објавена на 14 октомври, тој информира дека е примен во болница поради згрутчување на крвта. На втората фотографија, која е објавена на 26 јуни, тој информира дека ја примил и втората доза на вакцина и заради тоа може да ја посети својата мајка.

Но, од јуни до крајот на октомври, кога Олесен починува, поминати се три месеци, што значи поминало доста време за да може да се тврди дека згрутчувањето на крвта е предизвикано од вакцината. Освен тоа, згрутчување на крвта може да се случи од еден куп други причини, за да може олку лесно да се тврди дека вакцината е виновна за неговата смрт. Тоа може да настане кај возрасни луѓе, особено за оние над 65 години, кај луѓе кои долго седеле или лежеле, кај оние со зголемена тежина или семејна историја на згрутчување на крв, како и кај оние кои примаат одредени лекарства, се пушачи, но и поради други причини.

За да му се даде тежина на тврдењето дека вакцините се штетни и за да се делува поубедливо кон публиката, се тврди дека станува збор за најсилниот човек на светот. И ова не е вистина. Олесен е поранешен најсилен човек на светот, кој има срушено неколку рекорди, но никако не е сегашен актуелен најсилен човек на светот. Олесен кога починал имал 60 години, а во 1983 година станал дански шампион во супертешка категорија во кревање тегови. Оттогаш, поставил 199 Гинисови рекорди – а 37 од нив сè уште важат.

Во 2007 година, неговиот живот нагло се променил кога неговиот автомобил бил удрен од млад моторциклист. Во несреќата, Џорџ Олесен, меѓу другото, се здобил со многу повреди и од 2009 година тој поради повеќе здравствени проблеми добил инвалидска пензија.

Целото тврдење, дека вакцината го убила Олесен, е манипулација. Да, тој бил вакциниран, но испуштено е да се каже дека се соочувал со други здравствени проблеми повеќе години наназад и не станува збор за актуелниот најсилен човек на светот, пишува „Вистиномер“.