Ветување: Проширување на булеварот „Никола Карев“
[Извор: Изборна програма на Петре Шилегов– „Живот во Скопје за сите!“ стр.19 – датум, октомври 2017 г. ]
ОБРАЗЛОЖЕНИЕ:
Градоначалникот на Скопје, Петре Шилегов за локалните избори (октомври 2017г.), на кои како кандидат на СДСМ ја бараше довербата за градоначалничката функција во главниот град, вети проширување на булеварот „Никола Карев “. Ова ветување на Шилегов, наведено во неговата изборната програма, „Живот во Скопје за сите!“, во рамките на проектот: „Нови сообраќајни решенија го решаваме градскиот метеж!“ (стр.19), е исполнето.
Реконструкцијата на овој булевар се одвиваше во две фази и таа е целосно завршена. Деновиве финишираа градежните работи на потегот од крстосницата кај касарната „Илинден“ до Момин Поток, во вкупна должина од 980 метри, а на 17 јули оваа делница беше официјално пуштена во употреба.
Булеварот сега има 4 сообраќајни ленти, со разделно зеленило и мешани пешачко-велосипедски патеки од двете страни. Поставена е и нова атмосферска канализација, лед осветлување, а на потегот кај ридот изграден е потпорен ѕид во должина од 690 метри. Вкупната инвестиција на втората фаза од изградбата на оваа сообраќајница, која почна на крајот на минатата година (декември 2020), изнесува околу 160 милиони денари.
Станува збор за исклучително фреквентна сообраќајница која е најмногу искористена од жителите на Карпош, Центар, Чаир, Шуто Оризари, Бутел и Гази Баба, но како транзитна сообраќајница користена е и од оние што само минуваат низ овој дел на градот. Оваа сообраќајница ќе се надоврзе и на новата клучка кај Момин Поток чија изведба ќе започне наредната недела, а со нејзиното завршување очекуваме значително да се намали сообраќајниот метеж во овој дел од градот – изјави Шилегов на официјалното отворање на булеварот.
Реконструкцијата на булеварот „Никола Карев “ стартуваше во декември 2019 година, а во мај 2020 година заврши првата фаза од проширувањето на потегот од клучката кај Бит-пазар до влезот во касарната „Илинден“, со вкупна должина од 1.440 метри.
„Вистиномер“ минатата пролет го анализираше ова ветување на Шилегов и тогаш го оцени како делумно исполнето. Сега со проширувањето и пуштање во употреба на втората делница од булеварот – од крстосницата кај касарната „Илинден“ до клучката кај Момин Поток, ветувањето го сметаме за исполнето.
*****
Инаку, прширување на булеварот „Никола Карев“, ветуваше и претходниот градоначалник на Скопје, Коце Трајановски за локалните избори во 2013 година. Тогаш тој во неговата изборна програма „Нови дела за нов напредок, нови дела за подобро Скопје“ , ( стр. 55), вети дека проширувањето на овој булевар ќе биде направено во периодот (2013-2015) година, но тоа не се случи.
ИЗВОРИ:
- Изборна програма на Петре Шилегов– „Живот во Скопје за сите!“ стр.19 ( октомври 2017) [Проверено на 22.07.2021]
- Официјална веб-страница на Град Скопје (12.12.2020): Од денеска се гради и проширува булеварот Никола Карев до Момин Поток [Проверено на 22.07.2021]
- Грид.мк (12.12.2020): Почна втората фаза од изградбата и проширувањето на бул. Никола Карев до Момин поток [Проверено на 22.07.2021]
- Официјална веб-страница на Град Скопје (17.07.2021): Во Скопје отворен новиот булевар Никола Карев под касарната Илинден [Проверено на 22.07.2021]
- Тајм.мк (17.07.2021): Улицата Никола Карев кај касарна Илинден стана булевар [Проверено на 22.07.2021]
- Тајм.мк (13.12.2019): Започна проширувањето на Пластичарска [Проверено: 22.07.2021]
- Мета (13.12.2019): Почна реконструкцијата и проширувањето на Пластичарската улица во Скопје [Проверено: 22.07.2021]
- Грид (17.05.2020): Заврши првата фаза од реконструкцијата на „Пластичарска” [Проверено: 22.07.2021]
- Веб-страница на Град Скопје (24.02.2020): Заврши првата фаза од реконструкцијата на Пластичарска [Проверено: 22.07.2021]
- Вистиномер (18.05.2020): Пластичарска“ проширена од клучката кај Бит-пазар до влезот во касарната „Илинден“ [Проверено на 22.07.2021]
- Вистиномер (22.05.20016): Трајановски секоја година најавува проширување на Пластичарска [Проверено:22.07.2021]
