Високиот комесар за човекови права на Обединетите нации, Зеид Раад ал Хусеин, рече дека сирискиот град Алепо е „кланица“ и го повика Советот за човекови права да се дистанцира од „политичките несогласувања“ и да се фокусира на страдањата на цивилите.
Ал Хусеин отворената забелешка ја упати денеска на видеоконференција со 47 земји-членки на телото на ОН задолжено за човекови права, откако ја отвори посебната седница за Алепо, која ја свикаа Велика Британија и други поради кризата во овој сириски град.
Јорданскиот принц Ал Хусеин рече дека кршењето на правата и злоупотребите во Сирија, особено во источниот дел на Алепо, кој го држат бунтовниците, „претставува злостор од историски размери“.
Тој истакна дека е „колективен неуспех на меѓународната заедница што не може да ги заштити цивилите и да го запре крвопролевањето, кое треба сите да нè прогонува“.
Се очекува Советот за човекови права подоцна во текот на денот да гласа за резолуција која би требало да повика на зголемено следење на злосторствата во Алепо.
