Британскиот парламент ќе мора да даде согласност за тоа дали Британија смее да го почне процесот за напуштање на Европската Унија, одлучи британскиот виш суд.
Тоа значи дека владата не може сама да го активира членот 50 од Лисабонскиот договор.
Судиите донесоа одлука Тереза Меј да нема можност да го активира членот 50 без претходна согласност на парламентот.
„Судот не ги прифати аргументите на владата“, стои во соопштението од судот.
Минатиот месец жалба до вишиот суд поднесоа активисти кои тврдат дека премиерката Тереза Меј и нејзините министри немаат овластување да го применат членот 50 од Лисабонскиот договор, кој ѝ овозможува на земја членка да ја напушти Европската Унија без експлицитна поддршка од националниот парламент.
Се очекува владина жалба на одлуката на судот.
Меј изјави дека до крајот на март следната година ќе го активира членот 50 и службено ќе го извести Брисел за намерата Велика Британија да ја напушти Унијата.
