Вицепремиерот за добро владеење и транспарентност Арбен Фетаи објави дека на службениот мејл добил порака со закани по живот. Информацијата ја сподели на својот Фејсбук профил, каде тврди дека заканата пристигнала по неговата вчерашна изјава за отстранување на поимот „20 проценти“ за албанскиот јазик во Уставот.
„Емаилот е насловен ‘КУРШУМ ВО ГЛАВА ЗА ТЕБЕ ШИПО ФЕТАИ’ и содржи ваква порака: ‘20 процентот нема да се промени, но сè што е шиптарско ќе ве убиеме со куршум во глава. Да изумрете, мртов шиптар, добар шиптар; смрт за шиптарите’“, напиша Фетаи.
Тој вели дека го информирал министерот за внатрешни работи Панче Тошковски, од кого побарал акција и зголемување на мерките за неговата лична безбедност. Додава дека во подготовка е пријава за случајот.
„Истовремено, ги известувам сите оние со племенски начин на размислување дека нема сила што ќе нè спречи во одговорноста што сме ја преземале како функционери на коалицијата ВЛЕН. Потсетувам дека албанскиот јазик не претставува закана за ништо и никого. Јазикот е богатство, средство за комуникација што служи за разбирање и соработка, и затоа нема да дозволиме албанскиот јазик да биде изговор за манипулаторите од овој вид да ја попречат нашата работа“, пишува Фетаи во својата објава на Фејсбук.
